Dec 04 2007
હું છલકાઈ ગઈ
આગળ મેં પ્રેમમાં પડેલી એક સખીને સવાલો પૂછતી એક રચના લખી હતી… કોણે કર્યું કામણ સખી? જો કે, એ સખી પાસેથી તો મને કોઈ જવાબો જ ના મળ્યા… એટલે પછી હું જ એ સખી બની ગઈ ! :-) સાચું કહું તો આ રચના આનંદની કોઈ ક્ષણોમાં પહેલા જ લખાઈ ગઈ હતી… અને આના પરથી જ સખીને સવાલો પૂછતી એ સવાલ-રચના બનાવી હતી!
નવી નવી (કે જૂની જૂની?) પ્રેમમાં પડેલી જાણી-અજાણી તમામ સખીઓને આ કાવ્ય અર્પણ…!
(સફરથી હું લલચાઈ ગઈ… 19 જૂન, 2007)
ક્યાં દૂર છે તું?
યાદમાં રાખ્યો તને
મોઘમ સખા !
*
ખાલી હતી ઉભરાઈ ગઈ,
અંદરથી હું છલકાઈ ગઈ.
તારા વિરહમાં આમ તો,
કેવી હતી કરમાઈ ગઈ!
અલ્લડ હતી, પણ તેં સજન,
છેડી મને- શરમાઈ ગઈ.
ન્હોતી હસી કોઈ કારણે,
કારણ વિના મલકાઈ ગઈ.
રાખી હતી મોઘમ ખુશી,
પણ આંખમાં ડોકાઈ ગઈ.
કામણ નજરનું તેં કર્યું,
ને હું ફરી ભરમાઈ ગઈ.
વ્હાલમ, હું તારા સ્પર્શથી,
કોરી હતી, અભડાઈ ગઈ!
તું કર સભર ઊર્મિ, સખા!
ન કહું કદી, ‘મુરઝાઈ ગઈ’!
-’ઊર્મિ’ (23 ઑક્ટોબર, 2007)
છંદવિધાન: ગાગાલગા ગાગાલગા
* * *
