Jun 23 2009
(અઢળક ઈચ્છા… ૨૭ એપ્રિલ, ૨૦૦૯)
*
જીવનકાવ્યે
મિત્રતાનું ગાલગા
પણ જોઈએ.
*
માન્યતાને એક સરહદ જોઈએ,
રૂઢતાને પણ નિયંત્રણ જોઈએ.
શક્ય ક્યાં છે અહીં પરિત્યાગી થવું !
ત્યાગનું પણ એક વળગણ જોઈએ.
પ્રેમ, સમજણ કે પછી હો જીન્દગી…
સાવ નટખટ એક બચપણ જોઈએ.
હા, યુવાની થોડી ઉન્મદ જોઈએ…
પણ હો માનદ, એવું ઘડપણ જોઈએ.
જોઈએ, ઈચ્છા યે અઢળક જોઈએ,
પણ કદી અનહદની પણ હદ જોઈએ !
એક સરખી હોય ના ભરતી, સખા !
‘ઊર્મિ’ની પણ ક્યાંક વધઘટ જોઈએ…
-’ઊર્મિ’ (૨૬ મે, ૨૦૦૯)
Jun 10 2009
વ્હાલા મિત્રો, આજે આ ઊર્મિનાં સાગરની ત્રીજી વર્ષગાંઠ છે… ઊર્મિસાગર.કૉમ નાં વ્હાલા વાંચક-ચાહક-ભાવક મિત્રોને લીધે જ- એટલે કે આપ સૌને કારણે જ મારા આ ઊર્મિનાં સાગરમાં સતત ભરતી આવતી રહી છે અને આપણી આ ગાગરમાં સાગર હંમેશા છલકાતો ને ઊભરાતો રહ્યો છે. આપ સૌનાં સતત સહકાર અને પ્રોત્સાહન તેમ જ નિખાલસ અને પ્રેરણાત્મક ટીપ્પણીઓ બદલ આપ સૌનો અંતરની ઊર્મિથી આભાર…! ભવિષ્યમાં પણ કાયમ એ મળતાં જ રહેશે એવી આશા સહ… સ્નેહવંદન.
આજે ફરી પ્રસ્તુત છે, મારું એક ગીત-પઠન. આશા છે કે આપ સૌને ગમશે.
(’મળવા’ની ઘટના… 21 એપ્રિલ, 2009)
સખા, આપણા મળવાની જે ઘટના ઘટી અને ઊજવાયું ભીતર કૈં પળ પળ,
એને ઘટના કહું કે કહું અવસર ?
સખા, ઘટના કહું કે કહું અવસર ?
વરસોથી વાયરા આ થીજ્યા હતાં,
જ્યારે લીલાછમ્મ ગરમાળા મૂરઝ્યા હતા;
પછી સળવળતી લાગણીને વાચા ફૂટી ને
પછી દરિયાઓ ધોધમાર ઊમટ્યા હતા,
કંઈ કેટલાયે બંધ પછી તૂટ્યા હતા;
હવે ઝળહળતી સંધ્યાએ ધખધખતાં ગુલમ્હોર વરસે મુશળધાર હર પળ,
એને ઘટના કહું કે કહું અવસર ?
છાતીમાં મઘમઘતાં લીલુડાં સપનાં,
બળબળતા રોમરોમ છાના ને છપનાં;
તારાપણાંનો પછી સૂરજ ઊગ્યો ને
મારી ભીતર કૈં કેટલાયે ઉપવન પ્રગટ્યાં,
પછી સૂરજમુખીનાં મહીં ફૂલો ફૂટ્યાં;
હવે ફૂલોની સંગાથે કંટક કરે છે સખા, તારા તે નામતણી અટકળ,
એને ઘટના કહું કે કહું અવસર ?
-’ઊર્મિ’
May 28 2009
થોડા દિવસો પહેલા મારા એક ખાસ દિવસે મારા માટે સરપ્રાઈઝરૂપે સૌ પ્રથમવાર ગાગરમાં સાગર પર પ્રકાશિત થયેલ મારું એક અછાંદસ.
(ખુશીની ટી-પાર્ટી… નવેમ્બર 2000)
નાનપણમાં
રો…જ બપ્પોરે
ઘરના ઓટલા પર છાંયડે બેસીને
આપણે પેલી રમત રમતાં’તાં…
એ યાદ છે તને ?!
તું તારા ઘરેથી નાસ્તો લઈ આવતી
અને હું ભાખરી.
તું મારો વર બનતી
અને હું તારી વહુ…!
(કોકવાર ઊલટુયે કરતા.)
સામેના ઘરમાં રહેતી પેલી નાનકડી ખુશીને
આપણે કોકવાર આપણી દિકરી યે બનાવતા.
તું ઓફિસે જવાનું નાટક કરતી,
અને હું
નાનકડા સ્ટવ પર નાનકડી તાવી મૂકી
ભાખરી શેકવાનો અભિનય કરતી.
મારી ખોટુકલી રસોઈ થઈ જતી,
પછી
આપણે સાચુકલું સા….થ્થે બેસીને ખાતા…!
ખોટુકલું ઘર,
ખોટુકલી રસોઈ,
ખોટુકલા સંબંધો,
ખોટુકલા ઝઘડા,
પણ
સાચુકલી લાગણી
અને સાચુકલા મનામણાં…!
સાવ ખોટુકલી રમત અને
સાવ સાચુકલી મજા…!
પણ હવે
- કોણ જાણે કેમ -
બધ્ધું જ ઊલટું થઈ ગયું છે!
-ઊર્મિ
May 18 2009
ગઈકાલે લયસ્તરો પર પ્રથમવાર પ્રકાશિત થયેલી હિન્દી રદીફવાળી આ ગુજરાતી ગઝલની પ્રેરણા ગયા અઠવાડિયે મૂકેલી तेरे जाने के बाद ગઝલમાંથી જ મળી છે. મારી આ ‘ગઝલ-બેલડી’ ને ખૂબ જ ઉત્સાહથી સૌ પ્રથમવાર લયસ્તરો પર પ્રકાશિત કરવા બદલ લયસ્તરોનાં સંપાદકોનો ખૂબ ખૂબ આભાર…!
(સ્વપ્ન ટોળે વળે… 11 મે 2008)
*
ટહુકો થૈ ગ્યા
હરેક શ્વાસ, तेरे
आने के बाद !
*
આખું નભ પગ તળે तेरे आने के बाद,
ને બધું ઝળહળે तेरे आने के बाद.
સાવ ઉજ્જડ હતું એ બધું મઘમઘે,
પાનખર પણ ફળે तेरे आने के बाद.
કાળી ભમ્મર હતી રાત એ ઝગમગે,
સ્વપ્ન ટોળે વળે तेरे आने के बाद.
આંખમાં ઊમટે સાત રંગો સતત
અશ્રુઓ ઝળહળે तेरे आने के बाद.
શબ્દ કે અર્થ કૈં પૂરતું ના પડે,
કાવ્યમાં શું ઢળે, तेरे आने के बाद ?!
તું અહીં, તું તહીં, તું તહીં, તું અહીં,
ક્યાંય ‘હું’ ના મળે तेरे आने के बाद.
ઉર મહીં ‘ઊર્મિ’ તું, મારો પર્યાય તું,
તું બધે ખળભળે तेरे आने के बाद.
- ઊર્મિ (૭ મે ૨૦૦૯)
છંદવિધાન: ગાલગા ગાલગા ગાલગા ગાલગા
May 11 2009
ગઈકાલે લયસ્તરો પર પ્રથમવાર પ્રકાશિત થયેલી હિન્દી રદીફવાળી આ ગુજરાતી ગઝલ લખવાની પ્રેરણા જનાબ ઝફર ઈકબાલની ગુજરાતી રદીફવાળી ઉર્દૂ ગઝલ ઉપરથી મળી છે. આશા છે કે આપ સૌને આ પ્રયોગ ગમશે.
(લીલોતરીની સૂકી સૂકી વિદાય… 7 નવેમ્બર 2008)
*
બંસીથી સૂર
થઈ ગ્યો દૂર, तेरे
जाने के बाद !
*
આભ ઝરમર ઝરે तेरे जाने के बाद,
રોજ પીંછાં ખરે तेरे जाने के बाद.
સ્તબ્ધ સૃષ્ટિ સકળ ને અકળ સ્તબ્ધતા,
ના હવા મર્મરે तेरे जाने के बाद.
મેં મને ખોળી પણ ક્યાંયે હું ના મળી,
શૂન્યતા થરથરે तेरे जाने के बाद.
તારું ચાલ્યા જવું- એક પ્રસવયાતના,
કાવ્ય કૈં અવતરે तेरे जाने के बाद.
તું નથી, તું નથી, તું નથી, તું નથી,
તું બધે તરવરે तेरे जाने के बाद.
‘ઊર્મિ’ કેવી તરંગી હતી પણ હવે-
ના જીવે, ના મરે तेरे जाने के बाद.
- ઊર્મિ (૬ મે ૨૦૦૯)
છંદવિધાન: ગાલગા ગાલગા ગાલગા ગાલગા
Apr 23 2009
(ફુલ કહે ભમરાને, ભમરો વાત વહે ગુંજનમાં… એપ્રિલ 19, 2009)
*
વિરહાગ્નિમાં
તપીને પ્રીત બની
સ્મરણ-મૂર્તિ!
*
તારા હૃદયમાં ઊઠતી કોઈ કસક હશે,
મારા યે દિલમાં સાચવી મેં એ સરસ હશે.
ફૂટ્યું નથી અમસ્તુ આ ઝરણું ગઝલ તણું,
કાગળ હૃદય ને લાગણી થઈ ગઈ કલમ હશે.
તારા ગયા પછી પણ મહેંકી રહ્યું છે મન,
વાતાવરણમાં તારી રહી ગઈ અસર હશે.
એવું વિચારી જઈ રહી છું હું અજાણ્યે પથ,
રસ્તામાં જે પડ્યા છે એ તારા કદમ હશે.
તું કર નહીં અનાદર નખરાળી પ્રીતનો,
ફરિયાદી હોઠમાં રહી ચાહત પરમ હશે.
મારો નથી, છતાંયે મને કેટલી મમત !
‘તું મારો છે’- નો પાળ્યો મેં કોઈ ભરમ હશે…
તારા નયન સખા, હવે બહેકી રહ્યા છે કેમ?
બુદ્ધિને લાગણીતણી લાગી લગન હશે ?
તૂટે હજારવાર તો યે શિકવા ના કરે,
ઉર-ઊર્મિનો રહ્યો ભલા કેવો ધરમ હશે ?!
-’ઊર્મિ’
છંદવિધાનઃ ગાગાલગા લગાલલ ગાગાલગા લગા
(રાગઃ જ્યારે પ્રણયની જગમાં શરૂઆત થઈ હશે….)
Apr 07 2009
*
તારું સ્પર્શન…
સૂક્કાસટ રણમાં
આર્દ્ર ટહુકો !
*
એકધારી હોય ના કોઈ ભાવના,
તું સદા ભરતીની આશા રાખ મા.
મારા હોવાનું સખા, કારણ છે તું !
તારા હોવાની છું હું સંભાવના.
પાનખર તો છે વસંતી ખાતરી,
-ને ફરીથી મ્હોરવાની કામના.
હા, ઘણા સ્વપ્નો ફળ્યાં છે આંખને,
તું નથી એમાં તો એ શું કામનાં?!
એમ નહીં તાગી શકે એનું ઊંડાણ,
‘ઊર્મિ’ને બુદ્ધિ વડે તું માપ ના !
-’ઊર્મિ’ (માર્ચ ૨૦૦૯)
છંદવિધાન: ગાલગાગા ગાલગાગા ગાલગા
Mar 30 2009
(માહતાઈ મેરુની કે ખીણની ?… Lake George, NY… 22 ઑગષ્ટ 2005)
*
આભ ધરાનાં
ક્ષિતિજે સરવાળા-
એ કોણે કર્યા?
*
શબ્દને બોલ, નખરાળા કોણે કર્યા?
અર્થને આમ અણિયાળા કોણે કર્યા?
મેરુની માહતાઈ તો છે ખીણથી,
મોભનાં આમ સરવાળા કોણે કર્યા?
જોખમાશે આ સત્તા બધી ચંદ્રની,
ભર અમાસે આ અજવાળા કોણે કર્યા?
તેં રચી સૃષ્ટિ કેવી આ સોહામણી!
તો પછી આંખે પરવાળા કોણે કર્યા?
પંચતત્ત્વોથી નશ્વર તેં કાયા ઘડી,
પણ મંહી નેહનાં માળા કોણે કર્યા?
આપણો તો હતો મૂળ એક જ ધરમ,
પંથનાં તો આ ઘટમાળા કોણે કર્યા?
જેને મોઘમ ગણી સાચવ્યા મેં હતા,
એજ સ્મરણોને પગપાળા કોણે કર્યા?
હું અને તું કદી પણ જુદા ક્યાં હતા?!
સાહ્યબા, બોલ…વચગાળા કોણે કર્યા?
-’ઊર્મિ’
છંદવિધાન: ગાલગા ગાલગા ગાલગા ગાલગા
Feb 14 2009
Happy Valentines Day to all Dear ones…!
(સાથની અનંત સફર… 18 ઑક્ટોબર 2008)
*
શબ્દોની વચ્ચે
છોડેલી ખાલી જગ્યા…
વાંચી શકીશ?
*
આટલું જાણ્યું સખા ! એ પ્રીત પણ પ્યારી નથી,
સંગ એની એક-બે જો વેદના પાળી નથી.
જો પ્રણયની રાહ તેં આંસુથી શણગારી નથી,
છો સફરમાં હોય તું, પણ એ સફર તારી નથી.
વાંસળીની જેમ વાગી ના શકે તો જાણજે,
છે હજી પણ કૈંક અંદર… સાવ તું ખાલી નથી !
વ્હાલનાં વરસાદમાં પણ સાવ કોરો રહી જશે,
તું નહીં પલળે કદી, જો છતને ઓગાળી નથી.
પ્રેમને ઈશ્વર સમજ ને ભાગ્ય કર તું વ્હાલકુ,
ફર્ક શો છે હાથની રેખા જો હૂંફાળી નથી?!
હોમતી રહે છે મને કાયમ વિરહની અગ્નિમાં,
તોયે તારી યાદને મેં તો કદી ટાળી નથી.
પ્રીત, ઊર્મિ, બેબસી ને દર્દથી સજતી રહી,
જિંદગીને મેં સખા ! કંઈ ખાસ કંડારી નથી.
-’ઊર્મિ’ (સપ્ટેમ્બર 26, 2008)
છંદવિધાન: ગાલગાગા ગાલગાગા ગાલગાગા ગાલગા
Feb 05 2009
(તારા પગલાં… 11 મે 2008)
તારે નામ કરું છું:
હું મને
સમગ્રતયા.
મારી અંદર
એકવાર આવીને
કદી ન ગયેલી
તારાપણાની
એક વસંત સિવાય…
-’ઊર્મિ’
ગાગરમાં સાગર
