ગાગરમાં સાગર

આજે જયા-પાર્વતી (અલૂણાં) વ્રતનો છેલ્લો દિવસ હતો… આ વ્રત કરતી કન્યાઓ માટે આજની રાત એ જાગરણની રાત છે. અમારા કોમ્પ્લેક્ષમાં પણ એક દીકરીએ આ વ્રત રાખ્યું છે અને રાત્રે જાગવા માટે શું શું કરવું એની ઘણી ચર્ચા હસી-મજાક સાથે થઈ… ત્યારે મને આ ગીત યાદ આવ્યું.  તો આજે આ ગીત એ દીકરી અને અલૂણાં વ્રત કરતી એના જેવી બધી કન્યાઓને અર્પણ…

(ગોરમાને પાંચે આંગળીએ પૂજ્યાં ને…     ફોટો: વેબ પરથી)

સંગીત : ક્ષેમુ દિવેટીયા
સ્વર :  હર્ષિદા રાવલ
ફિલ્મ : કાશીનો દિકરો

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

ગોરમાને પાંચે આંગળીએ પૂજ્યાં ને નાગલા ઓછા પડ્યા રે લોલ
કમ્મખે દોથો ભરીને કાંઈ ટાક્યાં ને આભલાં ઓછાં પડ્યાં રે લોલ

માંડવે મ્હેક મ્હેક જૂઈની વેલ કે જૂઈના રેલા દડે રે લોલ
સૈ, મારે નેવાંનું હારબંધ ટોળું કે સામટું મોભે ચડે રે લોલ

ત્રાજવે ત્રંફેલા મોરની ભેળી હું છાનકી વાતું કરું રે લોલ
લોલ, મારે મોભારે કાગડો બોલે ને અમથી લાજી મરું રે લોલ

મેંદીએ મેલું હું મનની ભાત્ય ને હાથમાં દાઝ્યું પડે રે લોલ
આડોશપાડોશ ઘમ્મકે વેલ્યું ને લાપસી ચૂલે ચડે રે લોલ

સૈ, મારે ઊંબરાની મરજાદ કે ઓરડા ઠેસે ચડ્યા રે લોલ
લોલ મારે પથ્થરને પાણિયારે કે જીવતાં મોતી જડ્યાં રે લોલ

લોલ, ઊભી આંગણે નાગરવેલ કે પાંદડાં તૂટ્યા કરે રે લોલ
ઓરડે વાની મારી કોયલ આવે ને કાંઈ ઊડ્યા કરે રે લોલ

- રમેશ પારેખ

અલુણા નિમિત્તે ગોરમાનું વ્રત કરતી કન્યાનો ઉત્સાહ કદી જોયો છે ? એ જે કરે એ એને ઓછું જ પડે… ગોરમાને પૂજવા રૂના નાગલા ખૂટી પડે ને શરીરના શણગારમાં કમખાના આભલાંય એને ઓછાં જ લાગે. નેવેથી પાણીનાં રેલા દડતા હોય એમ મઘ મઘ જૂઈની વેલ માંડવે ચડી હોય અને કુંવારી કન્યા ત્રોફેલા મોર સાથે કે પછી કોઈ ચિત્તચોર સાથે મનમાં વાતો કરતી હોય એવામાં અતિથિના આવણાંની છડી પોકારતા કાગડાના બોલ પણ શરમાવી દે છે.
(આસ્વાદ : વિવેક ટેલર)