આજે આપણાં વ્હાલા કવિ શ્રી તુષાર શુક્લનો જન્મદિવસ છે… પ્રિય તુષારભાઈ, જન્મદિવસની અઢળક હાર્દિક શુભેચ્છાઓ… મારા પરિવાર અને મારા વાંચક-મિત્રો તરફથી.

મિત્રો, ગયા સપ્ટેમ્બરમાં ભૂલથી તુષારભાઈની વર્ષગાંઠ એમનાં જ એક ગીત એને પીડા કહું કે કહું પ્રેમ? થી આપણે ઉજવી નાંખેલી… :-) અને પછી જયશ્રીએ પણ ઉજવણી કરી દીધેલી… પરંતુ ત્યારે બે-ત્રણ મિત્રોએ મારું ધ્યાન દોરેલું કે કદાચ એમની જન્મતારીખ સપ્ટેમ્બરમાં નથી. પછી તો તુષારભાઈ પાસેથી જ એમની સાચી જન્મતારીખ confirm કરાવેલી… જે હતી આજની તારીખ, જૂન 29.   ત્યારે ખોટ્ટુકલી વર્ષગાંઠ ઉજવેલી અને આજે સાચ્ચુકલી વર્ષગાંઠ ઉજવીએ… (શુભેચ્છાઓ તો જો કે ત્યારે ય સાચ્ચુકલી જ હતી!) 

તમે તુષારભાઈનું ખૂબ જ લોકપ્રિય થયેલું અને એમનાં નામનાં પર્યાય-સમું થઈ ગયેલું પેલું ગીત દરિયાનાં મોજાં કંઈ રેતીને પૂછે તને ભીંજાવું ગમશે કે કેમ?  એમ પૂછીને થાય નહીં પ્રેમ તો વારંવાર સાંભળ્યું અને માણ્યું જ હશે..  જે ખરેખર તો પુરુષનાં મિજાજનું ગીત છે.  એ જ ગીતનાં સંદર્ભમાં તુષારભાઈએ તાજેતરમાં જ એક બીજું સ્ત્રીનાં મિજાજનું ગીત પણ લખ્યું છે.  જે નજીકનાં ભવિષ્યમાં જ એ ગીત જેટલી સફળતા પામે તો બિલકુલ નવાઈ નહીં લાગે !  જેનાં વિશે વધુ આપણે તુષારભાઈનાં અવાજમાં જ સાંભળીએ અને માણીએ… જે સૂર-સંવાદવાળા આરાધનાબેને લીધેલી મુલાકાત દરમ્યાન તુષારભાઈએ સંભળાવ્યું હતું…  (એમની આખી મુલાકાત ટહુકા પર સાંભળી શકો છો!)  આજે આપણે એમનાં એ જ ફ્રેશ ગીતને અહીં માણીએ.

oceanwave-best-pics
(તું દરિયાનું મોજું, હું કાંઠાની રેત…  Photo: Clark Little))

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

પેલી મોજાંએ ભીંજવેલી રેતી, સજન ! મને કાનમાં એ એટલું કહેતી, સજન…
‘તારા સાજનને એવું સમજાવ ને,
તું જ મોજું થઈ મળવાને આવ ને !’

રોજ ભીંજાતી રેત થાય કોરીધાકોર, રોજ ભીંજવતાં મોજાં પણ નવ્વાનક્કોર,
એક તરસે ને એક વળી વરસાવે હેત, મને સમજાયો હેત કેરો સાચો સંકેત,
હું તરસું, તું વ્હાલપ વરસાવ ને…!
મને મોજું થઈ મળવાને આવ ને…!

કોરી રેતીને ભીંજવતા મોજાં સમો પ્રેમ વર્ષો વિતે ને તોયે રહેતો નવો,
કોઈ બાંધે ન કોઈને એ સાચો સંગાથ, કેવો પળ પળનો બેઉ જણા માણે છે સાથ !
તારા હૈયાને તું પણ સમજાવ ને…!
મને મોજું થઈ મળવાને આવ ને…!

તું દરિયાનું મોજું, હું કાંઠાની રેત, જો પૂછ્યું હોત છીપને તો એ પણ કહેત,
હું તો કોરપ ઓઢીને તને ખીજવું, સજન ! તો જ થાય ને તને, કે આને ભીંજવું સજન…?!
મને ભીતરથી આજે છલકાવને..!
મને મનગમતું મનભર ભીંજાવ ને…!

-તુષાર શુક્લ

આખું ગીત ખૂબ જ મનભાવન અને મધુરું લાગ્યું.  ખાસ તો ભીતરથી તરબતર હોવા છતાંયે પ્રિયતમ નેહનું મોજું બની ફરી ફરીને ભીંજવી શકે એ માટે કોરપને ઓઢવાની વાત ખૂબ જ સ્પર્શી ગઈ…!  ફરીથી જન્મદિવસની ખૂબ ખૂબ શુભેચ્છાઓ, તુષારભાઈ… અને આવા જ ગીતો ગુજરાતી સાહિત્યને અને અમને હંમેશા આપતાં રહો એવી સનાતન અપેક્ષા સહ… સ્નેહવંદન.