(કોઇ હેતસૂના હૈયાની ડાળ…? ફોટો: વેબ પરથી)
આવતી રોકો વસંતને
મારે આંગણિયે ફુલડાંના ફાલ
લાવતી રોકો વસંતને
એ તો આંગણને આંબલિયે ટહુકો કરે,
અહીં એકલડું ઉર મારું હીબકાં ભરે.
કોઇ હેતસૂના હૈયાની ડાળ
હલાવતી રોકો વસંતને.
શાને શીળો સમીર બની અંગે અડે !
મારા ઝૂરતા જીવન સાથ રંગે ચડે !
એની વેણુંમાં વેદનાનું વ્હાલ
વહાવતી રોકો વસંતને.
- જયંત પાઠક
વ્હાલમ વિનાની વસંત વ્હાલી તો કેમ લાગી શકે ?
સૌ ભારતીય-મિત્રોને ગણતંત્ર દિવસની અનેકાનેક શુભેચ્છાઓ… આજે આપણે માણીએ આપણા રાષ્ટ્રગીતની બે યુ-ટ્યુબ ક્લિપ…
એક, આ રાષ્ટ્રગીતનાં અને કવિઓના પણ કવિ એવા શ્રી રવિન્દ્રનાથ ટાગોરનાં અવાજમાં…
જન ગણ મન અધિનાયક જય હે,
ભારત ભાગ્યવિધાતા.
પંજાબ સિન્ધુ ગુજરાત મરાઠા
દ્રવિડ ઉત્કલ બંગ,
વિંધ્ય હિમાચલ યમુના ગંગા
ઉચ્છલ જલધિ તરંગ;
તવ શુભ નામે જાગે,
તવ શુભ આશિષ માંગે,
ગાહે તવ જયગાથા.
જન ગણ મંગલદાયક જય હે,
ભારત ભાગ્યવિધાતા.
જય હે, જય હે, જય હે,
જય જય જય જય હે !
-રવીન્દ્રનાથ ટાગોર
અને બીજી, આપણા શ્રેષ્ઠ ભારતીય ગાયકોનાં અવાજમાં…
*
નોબૅલ પારિતોષિક વિજેતા શ્રી રવીન્દ્રનાથ ટાગોર રચીત બંગાળી ભાષાની એક કવિતામાંથી પ્રથમ પાંચ કડીઓને ભારતના રાષ્ટ્રગીત તરીકે અપનાવાયેલ છે. આ ગીત પ્રથમવાર ડિસેમ્બર ૨૮, ૧૯૧૧ ના દિવસે ઈંડિયા નેશનલ કૉંગ્રેસની સભામાં ગવાયેલ અને ૨ જાન્યુઆરી, ૧૯૪૭નાં દિવસે ગણતંત્રમાં રાષ્ટ્રગીત તરીકે સમ્માનિત કરાયું હતું.
અધીકૃત રીતે રાષ્ટ્રગીતને બાવન (૫૨) સેકંડમાં ગાવામાં આવે છે. ક્યારેક પહેલી તથા છેલ્લી કડી ને ૨૦ સેકંડના ગાળામાં પણ ગાવામાં આવે છે.
(સૌજન્ય: વિકિપિડિયા)
યુ-ટ્યુબ પર ફરતા ફરતા બીજી એક ખૂબ જ દુર્લભ ક્લિપ મળી… no words for it, except- SIMPLY AMAZING!! અમેરિકા-શિકાગોમાં સપ્ટેમ્બર 11, 1893નાં રોજ ભારત વિશે સ્વામી વિવેકાનંદનું પ્રવચન… આજના દિવસે ખાસ માણવા જેવું.
*
( એને વન પોપટની પાંખ… Very Rare Parrot Flower of Thailand!)
સંગીત : ક્ષેમુ દિવેટીયા
એ જી ફાગણ આવ્યો ફાંકડો કોઈ ફાગણ લ્યો,
એનો વાંકડિયો છે લાંક રે કોઈ ફાગણ લ્યો.
એ જી આંબાની મ્હોરી મંજરી કોઈ ફાગણ લ્યો,
એવાં સરવર સોહે કંજ રે કોઈ ફાગણ લ્યો.
એ જી દરિયા દિલનો વાયરો કોઈ ફાગણ લ્યો,
એ તો અલમલ અડકી જાય રે કોઈ ફાગણ લ્યો.
એ જી જુગલ વાંસળી વાજતી કોઈ ફાગણ લ્યો,
એને નહીં મલાજો લાજ રે કોઈ ફાગણ લ્યો.
એ જી દિન કપરો કંઈ તાપનો કોઈ ફાગણ લ્યો,
એની રાત ઢળે રળિયાત રે કોઈ ફાગણ લ્યો.
એ જી ઊડે કસુંબો આંખમાં કોઈ ફાગણ લ્યો,
એને વન પોપટની પાંખ રે કોઈ ફાગણ લ્યો.
એ જી ગગન ગુલાબી વાદળાં કોઈ ફાગણ લ્યો,
જોબનિયું કરતું સાદ રે કોઈ ફાગણ લ્યો.
એ જી ફાગણ આવ્યો ફાંકડો કોઈ ફાગણ લ્યો,
એનો વાંકડિયો કંઈ લાંક રે કોઈ ફાગણ લ્યો.
(ફૂલ ફૂલ પર ભમરા ડોલે… ફોટો: વેબ પરથી)
આયો, આયો મધુર મધુમાસ !
કુંજ કુંજમાં કોકિલ બોલે,
ફૂલ ફૂલ પર ભમરા ડોલે,
કળી કળી અંતર મૃદુ ખોલે,
લહર લહરમાં રાસ !
આયો મધુર મધુમાસ !
મંજરીએ દિશ દિશ ઊભરાઈ,
સુરભી અનિલે નહીં સમાઈ,
મનની મ્હેકી રહી અમરાઈ,
પલકે પ્રણય પ્રકાશ !
આયો મધુર મધુમાસ !
- પ્રિયકાન્ત મણિયાર
વાસંતી દિવસો એટલે કે કણ કણમાં ઉમટેલા ઉન્માદથી તરબતર મધુમાસ !
(ઉપવનમાં તો અજવાળુ અજવાળુ… ફોટો: વેબ પરથી)
સ્વરકાર: અમર ભટ્ટ
સ્વર: ઝરણા વ્યાસ અને સોનિક સુથાર
આલ્બમ: વિદેશિની
(આ આલ્બમનાં બધા ગીતોની ઝલક અહીં સાંભળો!)
ફુલ ખીલ્યું ને ઉપવનમાં તો અજવાળું અજવાળું,
ભમરાઓ તો મનમાં ગૂંજે ગીત ગહન મર્માળુ.
વાસંતી સંદેશો લઈ મન ઉડે આમ ને તેમ,
દિશ દિશમાં સુગંધી, સૂરજ છલકાવે છે પ્રેમ;
કંઠ ઝનકતી કોયલને હું કેમ કરી સંભાળું ?
ફુલ ખીલ્યું ને ઉપવનમાં તો અજવાળું અજવાળું.
આપણ ક્યાંય જવું નથીજી, ઉડે સૂર-ગુલાલ,
એકમેકનાં રંગેસંગે આપણ ન્યાલમ ન્યાલ;
આંખોમાં રેશમિયા મનનાં સપનાને પંપાળું,
ફુલ ખીલ્યું ને ઉપવનમાં તો અજવાળું અજવાળું.
‘ફુલ’ ખીલવાની ઘટના ઘટે તો આખાયે ‘ઉપવન’માં અજવાળું અજવાળું તો થાય જ ને… સુંદર ગીતને સુમધુર ગાયકીએ વધુ નિખાર્યુ હોય એમ લાગે છે.
* મારા ‘ઉપવન’માં ‘ફુલ’ ખીલવનાર મારી ‘વસંત’ને જન્મદિવસની વધામણી સાથે આ ગીત અર્પણ ! 
(છલકે છે આપમેળે રૂપાળી ડાળ… ફોટો: વેબ પરથી)
કેટલાંય વ્હાલ થકી આલેખે ધૂળ પર પોતીકાં ગીતને વસંત;
વેશ મહીં નવાનવા એથી તો હસી દે ધરતીની ધૂળનો ઉમંગ!
કાજળડે કોડ કેવા કોળે કે છલકે છે આપમેળે રૂપાળી ડાળ;
લાગ્યો છે એવો ને એવો પરશ અંતરમાં ડે રસાળ.
મ્હોરી ઉઠે છે મારો આખો અવતાર એવી અમરતની વાણી અનંત!
કેટલાંય વ્હાલ થકી આલેખે ધૂળ પર પોતીકાં ગીતને વસંત!
વારંવાર આનંદે પુલકે છે અંગ, કોની જાગે છે પ્રાણ મહીં માયા?
વણગાયાં ગીત આજ ઊમટે છે કંઠમાં, કોણે પીયૂષ એવાં પાયાં?
કોમળ કૈં કળી કળી ફૂટે છે ગીતની ને વેરે છે વનમાં સુગંધ!
કેટલાંયે વ્હાલ થકી આલેખે ધૂળ પર પોતીકાં ગીતને વસંત!
-રવીન્દ્રનાથ ટાગોર (અનુવાદ: સુરેશ દલાલ)
કવિઓના કવિ ટાગોરની કવિતામાં વસંતનો વૈભવ છે અને પ્રથમ વર્ષા વખતે ધરતીની જે સોડમ આવે એ સુગંધ છે. ટાગોરે જેટલું લખ્યું છે એટલું વાંચવા માટે કે સમજવા માટે એક આયુષ્ય ઓછું પડે. એમની કલમને ગીતના લય સહજ છે. આશય અને અભિવ્યકિત એમની નોખી-અનોખી રહી છે. ભલે એ વાત વસંતની કરતાં હોય પણ એ વસંતની સાથેસાથે યૌવનની વસંતનો પણ સંકેત આપતા રહે છે. વસંતની હવા જ જુદી હોય છે. રંગરાગ અને પરાગની સૃષ્ટિ, કેસૂડાનું વર્ચસ્વ, ફૂલોનો વૈભવ, ધરતીની ધૂળ જાણે કે અબીલગુલાબ અને કંકુ થઈ જાય. વસંત પોતે જ ધરતીની ધૂળ પર નર્યા વહાલથી પોતાના ગીતને આલેખે. આ પ્રેમની શકિત છે. પ્રેમને કારણે ધૂળ પોતે પણ સુગંધિત થઈ જાય. આખી સૃષ્ટિ જાણે કે કળી અને કૂલના સ્મિતથી હસી ઠતી હોય અને એના સ્મિતમાં ધરતીનો ઉમંગ છલકાતો હોય… (વધુ આગળ સુ.દ. દ્વારા આ ગીતનો આસ્વાદ અહીં વાંચો: દિવ્ય ભાસ્કર- હયાતીનાં હસ્તાક્ષર )
સૌ મિત્રોને વસંતપંચમીની ખૂબ ખૂબ શુભેચ્છાઓ અને હૈયામાં પણ કાયમી વસંત આવે/રહે એવી શુભકામનાઓ.
(કોકિલ, પંચમ બોલ બોલો… ફોટો: વેબ પરથી)
સ્વર-નિયોજન: અજીત શેઠ
સ્વર: નિરુપમા શેઠ
કોકિલ, પંચમ બોલ બોલો
. કે પંચમી આવી વસંતની.
દખ્ખણના વાયરાનાં આ શાં અડપલાં !
ઊઘડ્યાં લતાઓનાં યૌવનનાં સપનાં,
. લાગ્યો જ્યાં એક વાયુઝોલો -
. કે પંચમી આવી વસંતની.
મંજરી, મત્ત થઈ ડોલો
. કે પંચમી આવી વસંતની.
આંબે આંબે હસે રસની કટોરીઓ,
ગાતા ભમતા ભૃંગ પ્રેમ તણી હોરીઓ.
. આછો મકરંદ મંદ ઢોળો
. કે પંચમી આવી વસંતની.
આતમ, અંતરપટ ખોલો
. કે પંચમી આવી વસંતની.
ચેતના આ આવી ખખડાવે છે બારણાં,
હેતે વધાવી એને લો રે ઓવારણાં.
. ઝૂલે શો સૃષ્ટિનો હિંડોળો !
. કે પંચમી આવી વસંતની.
-ઉમાશંકર જોશી
(સૌજન્ય: લયસ્તરો)
મનહૃદયની ચેતના વસંતરૂપે ફરી નૂતન બનીને આવે ત્યારે એનાં ઓવારણા લેવાની વાત જ કેવી રોમાંચક લાગે !
(ઝળઝળિયાંની ઝાંખપ વચ્ચે લખીએ કયાંથી… ફોટો: વેબ પરથી)
નામ તમારું લખ્યું હજી ત્યાં આંસુ આવ્યાં આગળ,
ઝળઝળિયાંની ઝાંખપ વચ્ચે લખીએ કયાંથી કાગળ.
સુખની ઘટના લખું તમોને
ત્યાં દુ:ખ કલમને રોકે
દુ:ખની ઘટના લખવા જાઉ
ત્યાં હૈયું હાથને રોકે
છેકાછેકી કરતાં કરતાં પૂરો થઈ ગયો કાગળ,
નામ તમારું લખ્યું હજી ત્યાં આંસુ આવ્યાં આગળ.
અમે તમારાં અરમાનોને
ઉમંગથી શણગાર્યા
અમે તમારાં સપનાંઓને
અંધારે અજવાળ્યાં
તોય તમારી ઈચ્છા મુજથી દોડે આગળ આગળ,
ઝળઝળિયાંની ઝાંખપ વચ્ચે લખીએ કયાંથી કાગળ.
-મેઘબિન્દુ
‘મેઘબિન્દુ’નું નામ મેઘજી ખટાઉ ડોડેયા (જન્મ : ૧૯૪૧), કાવ્યસંગ્રહ : સંબંધ તો આકાશ, દરિયો, વિસ્મય. આ કવિ મુંબઈમાં- મુલુંડમાં રહે છે. એમની કવિતાનું મૂળ અંગત સંવેદનામાં છે. કાગળમાં ઘણીયે વાર લખવાનું ઘણું બધું હોય પણ છતાંયે જયાં કાગળ લખવાની શરૂઆત કરીએ ત્યાં તો શું લખવું એની વિમાસણ હોય છે. દિવ્ય ભાસ્કરની હયાતીનાં હસ્તાક્ષર કોલમમાં વાંચો, સુરેશ દલાલ દ્વારા આ ગીતનો ખૂબ જ સ-રસ રસાસ્વાદ.
ગીતાંજલિનું શ્રેણીનું આજે આ છેલ્લું ગીત… જો કે રાજેન્દ્રભાઈનાં ગીતો તો આપણે ઘણીવાર અહીં આવી જ રીતે માણતા જ રહીશું. ફરી એકવાર કવિશ્રીને ભાવભરી શ્રદ્ધાંજલિ.
(અંકમાં મયંક છે… ફોટો: વેબ પરથી)
પ્રસ્તાવના, સંગીત અને સ્વર : અમર ભટ્ટ
આલ્બમ : શબ્દનો સ્વારાભિષેક
પોયણીએ ઊંચું જોયું રે આકાશમાં.
કોણને એ મ્હોતી,
ને નેણ ભરી જ્યોતિ,
શું જાણ એને ન્હોતી ?
કે ચાંદલો બંધાણો પાણીનાં પાશમાં… પોયણી o
તમરાએ ગાન મહીં,
વાયરાને કાન કહી,
વન વન વાત વહી,
ઢૂંઢતી એ કોને આટલા ઉજાસમાં… પોયણી o
અંકમાં મયંક છે,
ન તોય જરી જંપ છે,
અંગમાં અનંગ છે,
શિબાબરી બનેલ અભિલાષનાં ઉદાસમાં… પોયણી o
પોયણીનાં અંકમાં જ મયંક છે અને તોયે એ સતત એની ખેવના કર્યે જ જાય છે– બિલકુલ ‘માણસ’ની જેમ…
* ‘શબ્દનો સ્વારાભિષેક’ આલ્બમ ખરીદવાની ઈચ્છા ધરાવનાર અમેરિકામાં રહેતા મિત્રો અહીંથી માહિતી મેળવી શકે છે…!
જ્યારથી આ ગીતની પ્રથમ કડી શ્રી સુ.દ.નાં મુખે એમનાં અતિપ્રિય ગીત તરીકે સાંભળી હતી, ત્યારથી હું આ ગીત શોધતી હતી… દિવ્ય ભાસ્કરની મહેરબાનીથી આજે આખરે એ મળી જ ગયું !
(આપણું હૃદય ખોલીએ ના કંઈ… ફોટો: વેબ પરથી)
બોલીએ ના કંઈ,
આપણું હૃદય ખોલીએ ના કંઈ, વેણને રહેવું ચૂપ;
નેણ ભરીને જોઈ લે, વીરા!
વ્હેણનાં પાણી ઝીલનારું તે સાગર છે વા કૂપ!
વનવેરાને મારગ વિજન,
સીમ જ્યાં સૂની ગુંજતી કેવળ આપણું ગાયું ગાન;
ગામને આરે હોય બહુજન,
લખનો મેળો મળીઓ રે ત્યાં કોણને કોની તાન?
માનમાં જવું એકલ વીરા!
તારલિયો અંધાર કે ઓઢી રણનો દારુણ ધૂપ!
આપણી વ્યથા,
અવરને મન રસની કથા, ઈતર ના કંઈ તથા.
જીરવી અને જાણીએ, વીરા!
પ્રાણમાં જલન હોય ને તો યે ધારીએ શીતલ રૂપ!
- રાજેન્દ્ર શાહ
જ્યાં ને ત્યાં હૃદય ખોલવાની આપણી (કુ)ટેવને કવિ અહીં પ્રેમથી ટકોરે છે. સામેની વ્યક્તિ આપણી એની સમક્ષ હૃદય ખોલવાને લાયક છે કે નહીં એ સમજ્યા કે ચકાશ્યા વગર જ મોટેભાગે આપણે આપણી વ્યથાની કથા કરતા રહીએ છીએ, જે બીજાને મન તો ક્યારેક માત્ર રસની કથા જ હોય એવુંય બને. એટલે જ થોડું મોઘમ રહીને ચૂપ રહેતા શીખવે છે આ ગીત. કવિશ્રી સુરેશ દલાલને ખૂબ જ પ્રિય એવાં આ ગીતનો એમણે ખૂબ જ સુંદર આસ્વાદ પણ કરાવ્યો છે, જે અહીં માણી શકો છો: હયાતીનાં હસ્તાક્ષર - બોલીએ ના કંઈ !
ઊર્મિનો સાગર
