ગાગરમાં સાગર

એક અઠવાડિયાથી વર્ષગાંઠની ઉજવણી નિમિત્તે ચાલી રહેલા આ કાવ્યપઠન સ્પેશ્યલને એક સ્પેશ્યલ ગઝલથી વિરામ આપીએ.  આપણા ઘરનાં જ કવિની એકદમ તરોતાજા ઓવનફ્રેશ ગઝલનાં કાવ્યપઠનથી… 

(દિલોજાન બનીશું….   ફોટો: વિવેક ટેલર)

ગઝલ પઠન - વિવેક ટેલર

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

થઈ આંગળી રથમાં ધરીનું સ્થાન બનીશું,
એ રીતે અમે જીતનું વરદાન બનીશું.

એ રીતે બધી વાતે સમાધાન બનીશું,
જ્યાં ગાંઠ પડે ત્યાં અમે નાદાન બનીશું.

દુશ્મન થશું તો મોતના ફરમાન બનીશું,
જો દોસ્ત બનીશું તો દિલોજાન બનીશું.

પગમાં યદિ ન હોય જો સ્વપ્નોના પગરખાં,
રસ્તા ઊઠીને બોલશે, વ્યવધાન બનીશું.

ઘર આખું સમેટી લો છતાં એ ન સમેટાય,
એ રીતથી તુજ હોવાનો સામાન બનીશું.

ઊગી હો જુદાઈની ભલે ભીંત ખીચોખીચ,
તું જ્યાં મળે એ દ્વારના ઓધાન બનીશું.

પહોંચીશું બધા ઘરમાં અમે નેટના રસ્તે,
મા ગુર્જરીનું એમ જીવતદાન બનીશું.

- વિવેક મનહર ટેલર
(26-05-2010)

*

વિપરીત સમયમાં પણ કશુંક બની બતાવવાની ખુમારી લઈને આવેલી આ ગઝલ ખરેખર ખૂબ જ સ-રસ થઈ છે.  બીજો શેર ખૂબ અદભૂત લાગ્યો… ગોખી લઈને વારંવાર વાપરવા જેવો… :)  અને મા ગુર્જરીવાળો શે’ર તો, અહાહાહા……………..

ઊર્મિસાગર.કૉમની ચોથી વર્ષગાંઠની ઉજવણીમાં ભાગ લેવા બદલ સૌ વાચક-ભાવક મિત્રોનો દિલથી આભાર… હવેથી ફરી આપણે અહીં રાબેતા મુજબ જ મળતા રહીશું, થોડા થોડા દિવસનાં આંતરે.

આજે BOGO… મતલબ કે buy one, get one free !  :-)  એટલે કે રિષભ મહેતાની ‘પ્રતીક્ષા’ ઉપરની એક નહીં પણ બે ગઝલો આપણે એમનાં જ અવાજમાં માણીએ.

( નહીં આવનારા, તને શી ખબર…? )

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

- ગઝલ : ૧ -

અમે તો કરી છે પ્રતીક્ષા પ્રતીક્ષા,
બહુ આકરી છે પ્રતીક્ષા પ્રતીક્ષા.

સળગવાનું કાયમ, તડપવાનું કાયમ,
કદી ક્યાં ઠરી છે પ્રતીક્ષા પ્રતીક્ષા !

નહીં આવનારા, તને શી ખબર કે
તને કરગરી છે પ્રતીક્ષા પ્રતીક્ષા.

અમે તો કદી થાકીને આંખ મીંચી,
કદી ક્યાં મરી છે પ્રતીક્ષા પ્રતીક્ષા !

તને અશ્રુ લાગે પરંતુ નયનથી
પળેપળ ખરી છે પ્રતીક્ષા પ્રતીક્ષા.

*

- ગઝલ : ૨ -

જરા પણ ન એવું, પ્રતીક્ષા રડાવે,
હૃદયમાં પડી છે તે શંકા રડાવે.

તને આખી મૌસમ પલાળી શકે ના,
મને માત્ર બે-ચાર છાંટા રડાવે.

મને મારી શંકાએ હસવા ન દીધો,
અને જો, તને તારી શ્રદ્ધા રડાવે.

તમન્ના ફુલોની સદા ડંખ દે છે,
અને લોક માને કે કાંટા રડાવે.

જણાયુ જો આંખોની મેં ભાળ કાઢી,
કે એને અવળચંડા સપના રડાવે.

કુહાડીનાં ઘાવો સહી લઉં છું, કિંતુ
મને માણસોની ઉપેક્ષા રડાવે.

- રિષભ મહેતા

રિષભઅંકલની ઘણી ગમતી ગઝલોમાં આ બે ગઝલો મને ખૂબ જ ગમે છે.  જાણે કે ‘પ્રતીક્ષા’નાં બધા જ સંભવિત પ્રકરણો એમણે આ બંને ગઝલોમાં સમાવી લીધા હોય એમ લાગે છે. પહેલી ગઝલમાં રદીફમાં ’પ્રતીક્ષા’નાં પુનરાવર્તનથી એની અસર ખૂબ જ ઘેરી થઈ શકી છે.  બીજી ગઝલમાં મૌસમવાળો અને અવળચંડા સપનાવાળો શે’ર ખૂબ ગમી ગયો…

પ્રજ્ઞાચક્ષુ ગૌરવ ગટોરવાળાનો પ્રથમ કાવ્યસંગ્રહ ‘પળનું પરબીડિયું ‘ હમણાં તાજેતરમાં જ કિરણભાઈનાં નૂતન ‘સાંનિધ્ય પ્રકાશન’ દ્વારા બહાર પડ્યો.   આ કાવ્યસંગ્રહનાં વિમોચન, પ્રવચન અને સમીક્ષાની વિગતવાર વાતો વિવેકે ‘લયસ્તરો’ પર ભાગ-૧ અ ને ભાગ-૨ માં કરી હતી… તો આજે આપણે એમાંની એક ગઝલ ગૌરવભાઈનાં જ અવાજમાં સાંભળીએ….

(પીવા મળે તો ઝાંઝવા પણ…          ફોટો: વેબ પરથી)

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

રણને અમારી પ્યાસનું પાણી બતાવશું,
પીવા મળે તો ઝાંઝવા પણ પી બતાવશું.

ચાહો તો એકરસ કરો- લોહી ને આંસુઓ,
તો પણ અલગ એ બેઉને પાળી બતાવશું.

વાચન અમારું આમ તો કાચું છે તે છતાં
ભાષા આ મૌન નેત્રની વાંચી બતાવશું.

નિર્ભય રહ્યું નથી હવે જીવન હવા ઉપર,
કહી તો જુઓ, આ શ્વાસને ત્યાગી બતાવશું.

ત્યારે જ માનશે સહુ શબ્દો છે ચાળણી,
જ્યારે આ લાગણી અમે ચાળી બતાવશું.

-ગૌરવ ગટોરવાળા

રણને પણ પોતાની પ્યાસનું પાણી બતાવવાની અને ખુદ ઝાંઝવાને પી જવાની તૈયારી બતાવનાર ગૌરવભાઈનાં કાવ્યસંગ્રહ માટે કિરણસિંહ ચૌહાણના ‘સાંનિધ્ય પ્રકાશન’ની આકર્ષક યોજના અને કાવ્યસંગ્રહના વિમોચનનાં કાર્યક્રમનો ટૂંકસાર આપ અહીં માણી શકો છો.  લાગણીને ચાળી બતાવવાની વાત ખૂબ જ ગમી ગઈ…

આજે માણીએ હેમંતભાઇની આ મઝાની ગઝલ, એમના પોતાના સ્વરમાં. ‘લલગાગા લલગાગા’.. આવો રદ્દીફ લઇને આવેલી ગઝલ - કોઇ પણ ગઝલકારને, કે ગઝલકાર બનવા માંગતા કોઇપણ ગઝલપ્રેમીને થોડી વધુ પોતીકી લાગશે. ગઝલના છંદમાં આવતા લઘુ-ગુરુ - લ અને ગા - ના બંધારણો સાથેનો એમનો એક અલગ જ નાતો હોય છે…

મને યાદ છે - એક વાર એક ગઝલકાર મિત્રએ મારી હાજરીમાં ટહુકો ખોલ્યો, અને એ દિવસે મેં મરીઝની એક ગઝલ મૂકી હતી… એ મિત્રએ ગઝલનો મત્લા વાંચવાની શરૂઆત કરી મોટેથી…

ફક્ત એક જ ટકો કાફી છે, પૂરતો છે મહોબતમાં,

અને આ શેર પૂરો કરે એ પહેલા એના મોઠે સંભળાયું ઃ

લગાગાગા લગાગાગા લગાગાગા લગાગાગા

લો… મેં મારી રીતે તો કોશિશ કરી આ ગઝલ વિષે કંઇક કહેવાની, અને હવે તમે કવિ હેમંતભાઇ પોતે શું કહે છે, એ પણ માણો…

આજે એક અલગ જ રદીફ – “લલગાગા લલગાગા” સાથે લખાયેલી ગઝલ પોસ્ટ કરું છું. રદીફ જ એવો છે કે (ખાસ તો છંદોથી અજાણ મિત્રો માટે) થોડીક પ્રસ્તાવના આપવી જરૂરી છે.

કોઈ અક્ષરના ઉચ્ચાર માટે લાગતાં સમયના આધારે એનું વજન લઘુ (લ) અથવા ગુરુ (ગા)એમ નક્કી થાય છે. લઘુ-ગુરુની ચોક્કસ સંરચના વાપરીએ તો લખાણ છંદમાં છે એમ કહેવાય. હવે આ નીચેની પંક્તિ એક શ્વાસે વાંચો (ખાલી જ્ગ્યા હોય ત્યાં થોડોક વિરામ આપો)

ગાગા લલગાગા લલગાગા લલગાગા

આ પઠન જો પાંચ છ વાર કરશો તો એક લય/ધૂન/ટ્યુન બની હોવાનું જણાશે. જેમ કે આપણે કોઈ ગીત ગણગણતાં હોઈએ એવું લાગશે. બસ આ લયબદ્ધતા જ છંદબદ્ધ કાવ્યોનો પ્રાણ છે.

જે છંદનું ઉદાહરણ મેં લીધું એ થોડો અઘરો છંદ ગણાય છે અને એમાં ગઝલ લખવાની ઈચ્છા હતી. રઈશભાઈએ એની સરસ ટેકનીક શીખવાડી કે આ લય મનમાં સતત ચાલતો રહે તો શબ્દો આપોઆપ એ લયમાં પકડાઈને આવે અને ગઝલ લખવું સહેલું થઈ જાય. શું લખવું એ નક્કી નહોતું પણ એક વાત મનમાં ઘોળાતી હતી કે જે ક્રમિકતા છંદોમાં છે એવી જ ક્રમિકતા જીવનમાં પણ જોવા મળે છે. બસ “લલગાગા લલગાગા” એ ક્રમિકતા સૂચક રદીફ બની ગયો અને આ પંક્તિઓ સ્ફૂરી.

પછી જીવનમાં દેખાતી અનેક ક્રમિકતાઓ ના રંગ આ ગઝલમાં ઊમટ્યાં.
- હેમંત પૂણેકર

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

આ વિશ્વના લયનું લલગાગા લલગાગા
સ્પંદન છે હૃદયનું લલગાગા લલગાગા

નક્ષત્ર, ગ્રહો, સૂર્ય, શશી – શબ્દ ગગનનાં
ને અસ્ત-ઉદયનું લલગાગા લલગાગા

ટકટકતો નથી એ હવે ઘડિયાળના કાંટે
ખળખળવું સમયનું લલગાગા લલગાગા

તૂટતો રહે, જોડાતો રહે દૃષ્ટિનો સેતુ
ભય મિશ્ર પ્રણયનું લલગાગા લલગાગા

આંખોમાં નિમંત્રણ અને શબ્દોમાં નિયંત્રણ
ઈચ્છાનું-વિનયનું લલગાગા લલગાગા

યાદોના ભરાવાનો આ કાગળ પર ઉતારો
સંચય અને વ્યયનું લલગાગા લલગાગા

શબ્દોથી બને પંક્તિ, તૂટે પંક્તિથી શબ્દો
સર્જન ને વિલયનું લલગાગા લલગાગા

મુજ મૌનનું ઐશ્વર્ય બન્યું શબ્દનો વૈભવ
સંધાન ઉભયનું લલગાગા લલગાગા

“હેમંત” રદિફ, કાફિયા રમતા રહે મનમાં
બાકીના વિષયનું લલગાગા લલગાગા

- હેમંત

———–

છંદઃ ગાગા લલગાગા લલગાગા લલગાગા

કવિ અને નાટ્યકાર સૌમ્ય જોશીનું ખૂબ જ જાણીતું અને માનીતું આ અછાંદસ કાયમ મુશાયરામાં અને કવિ સંમેલનોમાં હજીયે ખૂબ્બ જ દાદ લઈ જાય છે… આ અછાંદસ વાંચવા માટેનું નથી, સાંભળવા માટેનું છે.  એટલે જ્યારે તમે પહેલીવાર આને સાંભળો, ત્યારે શબ્દો વાંચ્યા વિના માત્ર આંખો બંધ કરીને જ સાંભળજો… પછી અમને કહેજો કે તમને એ કેવું લાગ્યું.  

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

આ સ્યોરી કે’વા આ’યો સુ ને ઘાબાજરિયું લા’યો સુ.
અજુ દુ:ખતું ઓય તો લગાડ કોનમાં ને વાત હોંભળ મારી.
તીજા ધોરણમાં તારો પાઠ આવે છ.
ભગવાન મહાવીર,
અવે ભા ના પાડતા’તા તોય સોડીને ભણાવવા મે’લી મેં માંડમાંડ
તો ઈને તો ઈસ્કૂલ જઈને પથારી ફેરવી કાલે,
ડાયરેક ભાને જઈને કીધું કે આપણા બાપદાદા રાક્ષસ,
તો મહાવીર ભગવાનના કોનમાં ખીલા ઘોંચ્યા.
અવે ભાની પર્શનાલીટી તને ખબર નહિં,
ઓંખ લાલ થાય ને સીધ્ધો ફેંસલો.
મને કે’ ઈસ્કૂલથી ઉઠાડી મેલ સોડીને,
આ તારા પાઠે તો પથારી ફેરવી, સાચ્ચેન.
અવે પેલાએ ખીલ્લા ઘોંચ્યા એ ખોટું કર્યું, હું યે માનું સું,
પણ એને ઓસી ખબર અતી કે તું ભગવાન થવાનો સ!
અને તીજા ધોરણમાં પાઠ આવવાનો તારો.
એનું તો ડોબું ખોવાઈ ગ્યું તે ગભરાઈ ગ્યો બિચારો.
બાપડાન ભા, મારા ભા જેવા હશે,
આ મારથી ચંદી ખોવાઈ ગઈ’તીને તે ભાએ ભીંત જોડે ભોડું ભટકાઈને
બારી કરી આલી’તી ઘરમાં
તો પેલાનું તો આખું ડોબું જ્યું તાર લીધે,
દિમાગ તપ્યું હશે તો ઘોંચી દીધા ખીલ્લા.
વાંક એનો ખરો,
હાડી હત્તરવાર ખરો,
પણ થોડો વાંક તારોય ખરો ક નહિં,
અવે બચારો બે મિનિટ માટે ચ્યોંક જ્યો,
તો આંસ્યુ ફાડીને એનું ડોબું હાચવી લીધું હોત
તો શું તું ભગવાન ના થાત?
તારું તપ તૂટી જાત?
અવે એનું ડોબું ઈનું તપ જ હતું ને ભ’ઈ !
ચલો એ ય જવા દો,
તપ પતાઈને મા’ત્મા થઈને બધાને ઉપદેશ આલવા માંડ્યો,
પછીયે તને ઈમ થ્યું કે પેલાનું ડોબું પાસું અલાવું?
તું ભગવાન, મારે તને બહુ સવાલ નહિં પૂસવા,
ઉં ખાલી એટલું કઉ’સું.
કે વાંક બેનો સે તો ભૂલચૂક લેવીદેવી કરીને પેલો પાઠ કઢાયને ચોપડીમોંથી,
હખેથી ભણવા દે ન મારી સોડીને,
આ હજાર દેરા સે તારા આરસના,
એક પાઠ નહિં ઓય તો કંઈ ખાટુંમોરું નઈં થાય,
ને તો ય તને એવુ હોય તો પાઠ ના કઢાઈ, બસ !
ખાલી એક લીટી ઉમરાઈ દે ઈમાં,
કે પેલો ગોવાળિયો આયો’તો,
સ્યોરી કઈ ગ્યો સે,
ને ઘાબાજરિયું દઈ ગ્યો સે!

– સૌમ્ય જોશી

જયશ્રીએ ઊર્મિસાગર.કૉમની ચોથી વર્ષગાંઠ નિમિત્તે મુકેશભાઈને કાવ્યપઠન માટે ખાસ ફરમાઈશ કરી અને જનમદિનની મુબારકબાદી પાઠવતું આ મજાનાં ગીતનું ખાસ પઠન કરીને મુકેશભાઈએ મોકલ્યું.  (ખૂબ ખૂબ આભાર, મુકેશભાઈ !)  તો આજે આ ગીત ટહુકો.કોમને ખાસ સ્નેહાર્પણ.  આ જ ગીત દ્વારા આજે ટહુકો.કૉમને પણ એની ચોથી વર્ષગાંઠની અઢળક અઢળક હાર્દિક શુભેચ્છાઓ પાઠવીએ.  ટહુકાને આજે એમ કહેવાનું મન થાય છે કે- ‘તુમ જીઓ હજારો સાલ, સાલમેં ટહુકા કરો તુમ હજાર...’ 

(ને ઉલ્લાસથી તરબતર આભ આખું વસે તારે ગામે, ટહુકો ડૉટ કોમ નામે… )

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

મુબારક, તને આ જનમદિન મુબારક.
કદી કોઈ નારંગી સાંજે હવાના સરોવર મહીંથી સુગંધોના ખોબા ભરી તેં ઉછાળ્યા,
હવે મોકલું છું આ કાગળની વચ્ચે બે ટીપા, બે ખોબા અને એક છાલક;
મુબારક, તને આ જનમદિન મુબારક.

પર્વતના હૈયામાં કલ્લોલની વાગતી વાંસળી એની
સાબિતી લઇને વહી જાય ઝરણું જરા એને ધારીને જો તો ખરી
તને નામ મારું ગમે ને મને પણ
છતાં સાથમાં એ નહીં છાપવાનું
વિધાતાએ જાતે જ છાપી દીધી એવી કંકોતરી.

ભલી આંખ વચ્ચે અનામત જગાએ હું બાંધુ છતાં
એક ટીપું વહે ને તણાઈ જતા તારી યાદોના સ્મારક;
મુબારક, તને આ જનમદિન મુબારક.

શિયાળાના પહેલા પ્રહરનો એ સૂરજ,
ચોમાસે ટપટપટી રાતોનો વૈભવ,
ને ઘખતા ઉનાળે પરબડીનાં સુખ્ખો કરું તારે નામે,
બધી ખુશીઓ પગમાં પહેરીને ઝાંઝર ફરે તારે આંગણ,
ને ઉલ્લાસથી તરબતર આભ આખું વસે તારે ગામે.

લિખિતંગ જો આ મધુમાલતી-શા અણીશુધ્ધ તારા
મહેકતા ચહેકતા અને વાંચતા ચહેરાનો ભાવક;
મુબારક, તને આ જનમદિન મુબારક.

કદી કોઇ નારંગી સાંજે હવાના સરોવર મહીંથી સુગંધોના ખોબા ભરી તેં ઉછાળ્યા
હવે મોકલું છું આ કાગળની વચ્ચે બે ટીંપા બે ખોબા અને એક છાલક
મુબારક, તને આ જનમદિન મુબારક.

- મુકેશ જોષી

ઊર્મિસાગર.કૉમની ચોથી વર્ષગાંઠ નિમિત્તે આજથી શરૂ થતા કાવ્યપઠન સપ્તાહનું આ પહેલું મોતી આપણા સુરતનાં કવિમિત્ર શ્રી કિરણભાઈ તરફથી…

(તેજ સૂર્યનું ચોરી લેવા…         ફોટો : તેજસ સોની)

સ્વર : કિરણસિંહ ચૈહાણ

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

તડકાના ત્રાટકમાં જીવ્યા, વરસાદી વાછટમાં જીવ્યા,
કાયમ એક ખુમારી સાથે ઘટમાં તોયે વટમાં જીવ્યા.

આંખ, હોઠ ને હૃદયની વચ્ચે થીજેલા સંકટમાં જીવ્યા,
મર્યાદાની ચુનરી ઓઢી સપનાઓ ઘૂંઘટમાં જીવ્યા.

આ તે કેવો મનસૂબો ને આ કેવી ખટપટમાં જીવ્યા?
તેજ સૂર્યનું ચોરી લેવા તારાઓ તરકટમાં જીવ્યા!

જીવ સટોસટની બાજી છે, તોપણ સાલું મન રાજી છે,
ભલે ચૈન ના પામ્યા તોયે મનગમતી એક રટમાં જીવ્યા.

સુગંધ ભીની સાંજની વચ્ચે, રંગીલા એકાંતની વચ્ચે,
શ્વાસ કસુંબલ માણ્યો જયારે જયારે તારી લટમાં જીવ્યા!

- કિરણસિંહ ચૌહાણ

જીવ સટોસટની બાજી હોય અને તોયે આપણું મન રાજી હોય; અને ત્યારે ભલે ને ચેન મળે કે ન મળે, પરંતુ જો જીવનમાં માત્ર એક મનગમતી રટ મળે તોયે આખું જીવન ઘણી આસાનીથી અને આનંદથી જીવી જવાય છે… એ જ અસાધારણ વાતને કવિએ અહીં કેવી સાધારણ રીતે કરી છે !

પાંચ-છ વરસ પહેલાં ગુજરાતી સાહિત્યના એક નવા જ યુગનો આરંભ થયો.  ‘ગુજરાતી ભાષા મરવા પડી છે’ના નારાઓ જ્યારે પૂરજોશમાં હતા એવા એક સમયે વિદેશમાં વસતા બે-ચાર જણે ગુજરાતી બ્લૉગની શરૂઆત કરી. શરૂઆતની થોડી ઉદાસીનતા બાદ બ્લૉગ્સની લોકપ્રિયતા વધવા માંડી અને આજે આ બ્લૉગ્સ ઇતિહાસ રચવાની ઘડીએ આવી ઊભા છે. આ બ્લૉગ્સ હવે ગુજરાતી ભાષાનું નવું સરનામું બનનાર છે.. મરણાસન્ન ભાષા માટે આ બ્લૉગ્સ એક સંજીવની બનીને આવ્યા છે… જે યુવાન પેઢી ગુજરાતીથી સાવ વિમુખ થતી જણાતી હતી એ જ યુવાપેઢીના હાથમાં બહુધા આ બ્લૉગ્સની લગામ છે… આજે તો હવે બિલાડીના ટોપની જેમ ગુજરાતી બ્લૉગ્સના રાફડા ફાટી નીકળ્યા છે પણ મોટા ભાગના બ્લૉગ્સ સ્થાપિત બ્લૉગ્સની નબળી નકલ અથવા ટૂંકી રેસના ઘોડા સાબિત થાય છે… બહુ ઓછા બ્લૉગ્સ અને સાઇટ્સ છે જે સમય અને ગુણવત્તાની - એમ બંને એરણ પર સો ટચનું સોનું સાબિત થાય છે…

ઊર્મિસાગર.કોમ સો ટચના સોનાની યાદીમાં આવતી અગ્રેસર વેબસાઇટ છે.

(સફળતાનો રસ્તો…   લિબર્ટી પાર્ક, ન્યુ જર્સી, ઓક્ટો-2009…  ફોટો : વિવેક ટેલર)

આજે દસ જુન… ઊર્મિસાગર.કોમની યાત્રા શરૂ થયાના ચાર વરસ પૂરાં થયા.. પાછું વળીને જોઉં છું તો આ યાત્રા ખાસ્સી સંતર્પક લાગે છે… ઊર્મિસાગર.કોમની બંને શાખાઓ- ગાગરમાં સાગર અને ઊર્મિનો સાગર- ગુણવત્તા અને સાતત્યની કસોટી પર ખરી ઉતરી છે. ઊર્મિની કવિતાઓમાં પણ સમય સાથે નિખાર આવતો આપણે સહુએ સાથે મળીને જોયો છે. હવે એની કવિતાઓ વિદેશના સામયિકોમાં પ્રગટ થાય છે અને ગુજરાતના લબ્ધપ્રતિષ્ઠ સામયિકમાં એના વિશે ટિપ્પણી પણ આવે છે. એ કવિ સંમેલનોમાં મુખર થઈ રહી છે તો એની કવિતાને ચિનુ મોદી જેવા દિગ્ગજો બિરદાવે પણ છે…

આજના આ સોનેરી દિવસે સાઇટની વર્ષગાંઠ નિમિત્તે મારી ભીતર જે ખુશી અને શુભ-ઇચ્છાનું ઝરણું ફૂટી નીકળ્યું છે એને તો આ કાગળને તાર-તાર ભીનો કરવા જ દઈશ પણ સાથે એ પણ યાદ કરાવવા ઇચ્છીશ કે આ કોઈ સીમાચિહ્ન નથી, આ તો માઇલ્સ્ટોન છે… હજી તો ઘણા ગાઉ કાપવાના બાકી છે… હજી તો ઘણા ગઢ સર કરવા બાકી છે અને સીમાચિહ્ન તો આખી સફરના અંતે છેક છે… હવે એ દિશામાં પ્રયાણ હો…

અંતે ઊર્મિની એક સુંદર ગઝલ:

આભ ગોરંભાઈ ગ્યું છે એ જ લખવાનું સખા !
તોયે ગુલાબી થયું છે એ જ લખવાનું સખા !

એક પંખી ફરફર્યું છે એ જ લખવાનું સખા !
એક પીંછું પણ ખર્યું છે એ જ લખવાનું સખા !

રાતભર આ લોચને પીડા પ્રસવની ભોગવી,
એક સપનું અવતર્યું છે એ જ લખવાનું સખા !

એમ તો લૂંટાવી દીધી છે હૃદય મિરાત, પણ-
એક સ્મરણને સાચવ્યું છે એ જ લખવાનું સખા !

દિલના દર્દોની કથા વિસ્તાર સંભળાવ્યા પછી,
કેટલું આ દિલ બળ્યું છે એ જ લખવાનું સખા !

કેટલી ઊંચી ચણી’તી ‘હું’પણાની ભીંત મેં !
ભીંતમાં કાણું પડ્યું છે એ જ લખવાનું સખા !

કેટલાં દરિયા વલોવ્યાં ને ઉલેચ્યાં, આખરે-
‘ઊર્મિ’નું મોતી જડ્યું છે એ જ લખવાનું સખા !

*

કાલથી એક અઠવાડિયા માટે અહીં કાવ્યપઠન-સપ્તાહની ઉજવણી રાખી છે… તો આ ઉજવણીમાં સૌને પધારવાનું ને ભાગ લેવાનું અમારું હાર્દિક આમંત્રણ.   તો ચાલો આપણે રાહ જોઈએ કે કાવ્યપઠનનાં કયા કયા મોતીઓ કાલથી ઊર્મિ અને જયશ્રી લઈને આવે છે…