કવિશ્રી ઇન્દુલાલ ગાંધીનાં જન્મદિવસે એમનું એક યાદગાર ગીત માણીએ…
(વાયુ વીંઝાશે ને દીવડો હોલાશે…)
પ્રભુજીને પડદામાં રાખ મા,
પૂજારી, તારા આતમને ઓઝલમાં રાખ મા !
વાયુ વીંઝાશે ને દીવડો હોલાશે એવી ભીતિ વંટોળિયાની ભાખ મા,
પૂજારી, તારા આતમને ઓઝલમાં રાખ મા !
આડે ઊભો તારો દેહ અડીખમ ભળી જાશે એ તો ખાખમાં,
પૂજારી, તારા આતમને ઓઝલમાં રાખ મા !
ઊડી ઊડીને આવ્યાં પંખી હિમાળેથી થાક ભરેલો એની પાંખમાં,
સાત સમંદર પાર કર્યા તોયે નથી રે ગુમાન એની આંખમાં;
પૂજારી, તારા આતમને ઓઝલમાં રાખ મા !
આંખનાં રતન તારા છોને હોલાય છોને હિરા લૂંટાય તારા લાખના,
હૈયાનો હિરો તારો નહિ રે લૂંટાય કોઈથી, ખોટા હીરાને ખેંચી રાખ મા;
પૂજારી, તારા આતમને ઓઝલમાં રાખ મા !
-ઇન્દુલાલ ગાંધી
લયસ્તરો પર યાદગાર ગીતોની શ્રેણીમાં આજે એમનું બીજું સુંદર ગીત પણ માણો…
આજ અમે અંધારું શણગાર્યું અને ટહુકા પર સાંભળો એમનું ખૂબ વખણાયેલું ગીત, આંધળી માંનો કાગળ !
