ગાગરમાં સાગર

નવરાત્રિ 2009 નાં ગરબા-રાસની રમઝટ અહીં એકીસાથે ક્રમમુજબ સાંભળો…

(if you want to skip the song, drag the playing-bar all the way to the end)

મા મનનાં મંદિરિયે પધારો -રિષભ મહેતા
આજ માતાજી આવ્યા મારે આંગણે રે
સોળે શણગાર સજી નિસર્યા માં અંબિકા - તુષાર શુક્લ
ઘોર અંધારી રે રાતલડીમાં નીકળ્યા ચાર અસવાર
માનો ગરબો રે રમે રાજને દરબાર
ઘોર અંધારી રે રાતલડીમાં આવી તારે દ્વાર
પંખીડા રે ઉડી જાજો પાવાગઢ રે
એક વણઝારી ઝૂલણાં ઝૂલતી’તી…
ઊંચા મંદિર નીચા મોલ (2 audio)
ઢોલીડા ઢોલ રે વગાડ મારે હીંચ લેવી છે…
સૂરજનાં દેશમાં ચાંદો ઉગ્યો રે લોલ -રિષભ મહેતા
ઓઢણી ઓઢું ઓઢું ને ઉડી જાય
હો રંગ રસિયા, ક્યાં રમી આવ્યા રાસ જો ? (2 audio)
મણિયારો તે હલુ હલુ…
ચાંદલિયો ઊગ્યો રે સખી મારા ચોકમાં…
હો પૂનમની પ્યારી પ્યારી રાત…

થાળ :
હો મહાકાળી, તું પાવાવાળી, તું વહેલી પધારજે (થાળ) -દલપત પઢિયાર (no audio)

દિવાળીની આગોતરી શુભેચ્છાઓ સહ…

મિત્રો, આશા છે કે નવરાત્રિથી શરદપૂનમ સુધીની રમઝટ તમે જરૂર માણી હશે… આજે પ્રસ્તુત છે એક ખાસ થાળ.   મારે માટે આ થાળ  જરા ખાસ છે, કારણ કે એની સાથે અતીતનાં ઘણા સંભારણા જોડાયેલા છે.  કદાચ એ સંભારણાએ જ આજ સુધી એ થાળને ખાસ બનાવી રાખ્યો છે… થાળ પહેલાં ઘણા વખતે આજે મારી થોડી બકબક પણ કરી લઉં… (તમને બોરીંગ લાગે તો નીચેનો આખો ફકરો કુદાવી જવાની તમને છૂટ છે!   )

અમે નાના હતા ત્યારે અમારા ગામનાં ફળિયામાં ગરબા ગાવાની અનહદ મજા અમે ભરપૂ…ર રીતે માણેલી. ત્યારે જે ગરબા અમે ગાતા (એટલે કે કોક ગવડાવતું ને અમે ઝીલતાં!) એમાનાં અમુક ગરબાઓ તો ગામ છોડ્યાં બાદ આજ સુધી ફરી ક્યાંય સાંભળવા મળ્યાં જ નથી. માતાજીની માટલી જેમને ત્યાં માંડી હોય એમનાં ઘરે ગરબા પહેલા થતી આરતીમાં ખાસ જવાનો એક જાતનો શોખ હતો… (કે પછી શ્રદ્ધા હતી!)  એમનાં ઘરમાં આરતી અને થાળ ગાયા બાદ એ માટલીને ફળિયામાં વચ્ચોવચ્ચ મૂકવામાં આવતી. રાત્રિનું ભોજન પતાવીને ફળિયામાં જેમને જેમને ત્યાં માટલી મૂકેલી દેખાય એમને ત્યાં બધા વારાફરતી ભેગા થાય… સૌથી પહેલાં જેમને ત્યાં ગરબા ગવાતાં એમને ત્યાં માત્ર પુરુષો જ ગરબા ગાઈ શકતાં- એવો વર્ષો જૂનો કોઈ (સ-કારણ) રિવાજ હતો.  વળી ફળિયાનાં લોકો કદી કોઈને ત્યાં ગરબામાં અડધા-અડધા વહેંચાતા નહીં, બલ્કે વારાફરતી બધાને ત્યાં એક સાથે જ ગરબા ગાતાં.  બે તાળી, ત્રણ તાળી અને વળી છેલ્લે રમઝટ ચાલતી ત્યારે તો ચાર-ચાર તાળી… જેમાં અમે ૭-૮ જણાં યુવાનો અને તરુણો  છેલ્લે સુધી કુંડાળામાં રહેતા… અને (વગર ચપ્પલે કાંકરાવાળા ફળિયામાં) ઢોલ સાથે હરિફાઈ કરતાં.  ચાલો, એ બધી વાત કદી પૂરી જ નહીં થાય… એટલે ફિર કભી… મારે જે કહેવું છે તે એ કે– અમે જે ગરબા ગાતા એમાં ફરી કદી ન સાંભળેલા અને ન માણેલા એ ગરબાઓમાં એક થાળ પણ હતો. ગરબા પૂરા થયા બાદ પ્રસાદ ધરાવીને કાયમ એક પાડોશી-કાકા એ થાળ ખાસ ગવડાવતા અને અમે રોજ ખરેખર એમનાં એ થાળનાં ગવડાવવાની પ્રસાદની જેમ જ રાહ જોતા.  થાળનું મુખડું તો મને હંમેશ માટે યાદ રહી જ ગયેલું પરંતુ આખો થાળ સમયનાં વ્હેણની સાથે સાવ ભૂલાઈ ગયેલો. દર વખતની જેમ આ વખતની નવરાત્રિમાં પણ મને એ થાળ અચૂક યાદ આવ્યો હતો. પણ આ વખતે મેં એ થાળ મેળવવાનો ખરેખર પ્રયત્ન કર્યો.  આમ પણ એક-બે વરસથી એ ગામનાં બે-ત્રણ છોકરાઓ જોડે અનુસંધાન થયેલું જ હતું. એમાંના એક ભાઈને એવું વિચારીને મેં કામ સોંપ્યું કે ગમે ત્યારે તો એ મળશે જ ને. એ ભાઈએ તરત આફ્રિકાથી એનાં બીજા ભાઈબંધને દેશમાં-ગામમાં ફોન કર્યો જે સંજોગવસાત એ કાકાનો ભત્રીજો જ હતો.  અને એ ભાઈબંધે તાત્કાલીક એ કાકાની જૂની નોટબુકમાંથી એ થાળ સ્કેન કરીને એને ઈમેલ કર્યો.   અને મારા પરમ આશ્ચર્યની વચ્ચે એ કામ માત્ર એક જ દિવસમાં થઈ ગયું…!!  અને બીજે જ દિવસે સવારે ઉઠીને જોઉં છું કે મારા ઈનબોક્ષમાં એ કાકાનાં હસ્તાક્ષરવાળો આખો થાળ મોજૂદ હતો… જે મને વર્ષો પહેલાંનાં એ થાળ પછી મળતાં માતાજીનાં કોપરાં-ખાંડનાં પ્રસાદ જેવો જ ગળચટ્ટો લાગ્યો !  (અઢળક આભાર, પ્રિય ગુરુ અને રવિને…!)

(રાગ: ઓ ફિરકીવાલી તું કલ ફિર આના…)

હો મહાકાળી, તું પાવાવાળી, તું વહેલી પધારજે,
મારા ભોજનીયા જમવાને વહેલી આવજે…
મહાકાળી, તું પાવાવાળી…

ખાજા કરીને જલેબી-પુરી છે, માતાજી ઓ માતાજી !
બરફી, પેંડા ને હલવો મેસુર છે, માતાજી ઓ માતાજી !
બાજઠ મુકી… બાજઠ મુકી થાળી કીધી જળ જમનાનાં લાવી…
મહાકાળી, તું પાવાવાળી…

કંસાર ઘીની વેઠમી બનાવી, માતાજી ઓ માતાજી !
દાળભાત શાક રસ રોટલી બનાવી, માતાજી ઓ માતાજી !
ચટણી પાપડ… ચટણી પાપડ લીંબુ અથાણા- જે જોઈએ તે લેજો…
મહાકાળી, તું પાવાવાળી…

પકવાન પુરી ને દહીંતરા શ્રીખંડ છે, માતાજી ઓ માતાજી !
પાતરા કચોરીને ભજીયા ગરમ છે, માતાજી ઓ માતાજી !
દહીંને ભાંગી… દહીંને ભાંગી છાશ બનાવી ફડકો મારી લેજો…
મહાકાળી, તું પાવાવાળી…

ચોસઠ પાનનાં બીડલાં બનાવ્યાં, માતાજી ઓ માતાજી !
લવિંગ સોપારી ને એલચી મંગાવ્યાં, માતાજી ઓ માતાજી !
અત્તર ખુશ્બુ… અત્તર ખુશ્બુ તેલ સુગંધી રૂમાલ માંગી લેજો…
મહાકાળી, તું પાવાવાળી…

દાસ દલપત તારો થાળ ધરાવે, માતાજી ઓ માતાજી !
દાસ દલપત તારો થાળ ગવડાવે, માતાજી ઓ માતાજી !
ભાવે જમજો… ભાવે જમજો ગરબે રમજો ભૂલની માફી દેજો…
મહાકાળી, તું પાવાવાળી…

-દલપત પઢિયાર

*

સૌ મિત્રોને શરદપૂર્ણિમાની દૂધ-પૌંઆ જેવી રસભરી અને ઘારી જેવી ગળી ગળી અઢળક શુભેચ્છાઓ…

(મારી પ્રીતમ સાથે છે મુલાકાત…    ફોટો: ક્રિષ્ના.કૉમ પરથી)

સંગીત: સી. અર્જુન
સ્વર: ઉષા મંગેશકર
ફિલ્મ: ખમ્મા મારા વીરા

હો પૂનમની પ્યારી પ્યારી રાત, મારી પ્રીતમ સાથે છે મુલાકાત,
આજ તું ના જાતી… ના જાતી, ના જાતી.

ચમકે છે નભમાં જેટલાં તારા… જેટલાં તારા હો !
હો ચમકે છે નભમાં જેટલાં તારા, સપનાં તે એટલાં મનમાં,
આજની આ પૂનમ છે જેવી રૂપાળી… જેવી રૂપાળી હો !
હો આજની આ પૂનમ છે જેવી રૂપાળી, એવું જ રૂપ મારા તનમાં;
જોજે થાયે ના આજે પ્રભાત, મારી પ્રીતમ સાથે છે મુલાકાત,
આજ તું ના જાતી… ના જાતી, ના જાતી.
હો પૂનમની પ્યારી…

જાગી છે પ્રીત મારી જન્મોજનમની… જન્મોજનમની હો !
હો જાગી છે પ્રીત મારી જન્મોજનમની, રમશું રે રાતભર રંગમાં,
જાઓ જાઓ સખીઓ થાશે રે મોડું… થાશે રે મોડું હો !
હો જાઓ જાઓ સખીઓ થાશે રે મોડું, સાજન છે કોઈનાં સંગમાં;
મને કરવા દ્યોને થોડી વાત, મારી પ્રીતમ સાથે છે મુલાકાત,
આજ તું ના જાતી… ના જાતી, ના જાતી.
હો પૂનમની પ્યારી…

*

(તાણીને બાંધે રે નવરંગ પાઘડી…       ફોટો: વેબ પરથી)

સ્વર-સંગીત: ?

હે આસો માસો શરદ પૂનમની રાત જો,
હે ચાંદલિયો ઊગ્યો રે સખી મારા ચોકમાં.
હે આસો માસો…

હે સસરો મારો ઓલ્યા જનમનો બાપ જો,
હે સાસુ રે ઓલ્યા જનમની માવડી.
હે આસો માસો…

હે જેઠ મારો અષાઢીલો મેઘ જો,
હે જેઠાણી ઝબૂકે વાદળ વીજળી.
હે આસો માસો…

હે દિયર મારો તાંબલિયાનો ઢોલ (?) જો,
હે દેરાણી તાંબલિયા કેરી પાંદડી(?).
હે આસો માસો…

હે પરણ્યો મારો સગી નણંદનો વીર જો,
હે તાણીને બાંધે રે નવરંગ પાઘડી.
હે આસો માસો…

*

મિત્રો, આજનો રાસ માણવા પહેલાં સૌપ્રથમ આપણે આપણા રાષ્ટ્રપિતા ગાંધીબાપુને યાદ કરી એમનાં જન્મદિવસે એમને સ્મરણાંજલિ અર્પણ કરીએ…

તાજેતરમાં મેં વાંચેલા ગાંધીજી વિશેનાં આ લેખો તમને પણ જરૂર વાંચવા ગમશે:
ગાંધી બાપુને યાદ કરવાની સીઝન -ચન્દ્રકાંત બક્ષી
મનુબેન ગાંધીનાં સંસ્મરણો…
લગ્નની કંકોતરીમાં ગણપતિનાં સ્થાને ગાંધીબાપુ

લયસ્તરો પર આજની ત્રણ ગાંધીવિશેષ પોસ્ટ માણવાનું પણ ભૂલશો નહીં: 
ગાંધી-વિશેષ:૧: ગાંધી જયંતી – નાથાલાલ દવે,
ગાંધી-વિશેષ:૨: તમે ગાંધીજીને જોયા હતા ? – પ્રિયકાન્ત મણિયાર, 
ગાંધી-વિશેષ:૩: ગાંધીજયંતી – ઉમાશંકર જોશી

*

(અણિયાળી રે ગોરી તારી આંખડી રે… )

સંગીત : ગૌરાંગ વ્યાસ
સ્વર : પ્રફુલ દવે અને સુમન કલ્યાણપુર

હાં… મણિયારો તે હલુ હલુ થઈ રે વિયો ને મુજા દલડાં ઉદાસીમાં હોય રે,
છેલ મુજો, વરણાગી મણિયારો… કે બેન મુજો, પરદેશી મણિયારો.

હાં… મણિયારો તે કળાયેલ મોરલો ને કાંઈ હું રે ઢળકતી ઢેલ રે,
છેલ મુજો, વરગાણી મણિયારો… કે બેન મુજો, પરદેશી મણિયારો.

હાં… અણિયાળી રે ગોરી તારી આંખડી ને કાંઈ હું રે આંજેલ એમાં મેશ રે,
છેલ મુજો, વરણાગી મણિયારો… કે બેન મુજો, પરદેશી મણિયારો.

હાં… મણિયારો તે અડાબીડ આંબલો ને કાંઈ હું રે કોયલડીનો કંઠ રે,
છેલ મુજો, વરણાગી મણિયારો… કે બેન મુજો, પરદેશી મણિયારો.

હાં… પનિહારીનું ઢળકંતુ બેડલું ને કાંઈ હું રે છલકંતુ એમાં નીર રે,
છેલ મુજો, વરણાગી મણિયારો… કે બેન મુજો, પરદેશી મણિયારો.

- છંદ -

*

(આ ચૂડલિયું રે મૂલવતાં વ્હાણલાં વાઈ ગિયાં…)

સંગીત: અવિનાશ વ્યાસ
સ્વર: ઉષા મંગેશકર(?) અને ?

હો રંગ રસિયા, ક્યાં રમી આવ્યા રાસ જો ?
આ આંખલડી રાતી રે, ઉજાગરો ક્યાં રે કીધો ?

આજ અમે ગ્યા’તા મણિયારાને હાટ જો,
આ ચૂડલિયું રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આવ્યા રાસ જો ?
આ આંખલડી રાતી રે, ઉજાગરો ક્યાં રે કીધો ?

આજ અમે ગ્યા’તાં દોશીડાને હાટ જો,
આ ચૂંદલડી રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આવ્યા રાસ જો ?
આ આંખલડી રાતી રે, ઉજાગરો ક્યાં રે કીધો ?

આજ અમે ગ્યા’તાં મોચીડાને હાટ જો,
આ મોજડિયું રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આવ્યા રાસ જો ?
આ આંખલડી રાતી રે, ઉજાગરો ક્યાં રે કીધો ? 

*

સ્વર : હેમુ ગઢવી અને વૃંદ

- છંદ -

હો રંગ રસિયા, ક્યાં રમી આઇવા રાસ જો ?
આંખલડી રાતી ને ઉજાગરો ક્યાં રે કર્યો ?

આજ અમે ગ્યા’તા હોનીડાને હાટ જો,
આ ઝૂમણલાં રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આઇવા રાસ જો ?
આંખલડી રાતી ને ઉજાગરો ક્યાં રે કર્યો ?

આજ અમે ગ્યા’તા મણિયારાને હાટ જો,
આ ચૂડલિયું રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આઇવા રાસ જો ?
આંખલડી રાતી ને ઉજાગરો ક્યાં રે કર્યો ?

આજ અમે ગ્યા’તાં દોશીડાને હાટ જો
આ ચૂંદડીયું રે મૂલવતાં વ્હાણલાં વાઈ ગિયાં.

હો રંગ રસિયા, ક્યાં રમી આઇવા રાસ જો ?
આંખલડી રાતી ને ઉજાગરો ક્યાં રે કર્યો ?

*

*

(હાય હા…ય…!        કાર્ટૂન : મહેન્દ્ર શાહ)

સંગીત: મહેશ-નરેશ કનોડિયા
સ્વર: અલ્કા યાજ્ઞિક અને પ્રફુલ્લ દવે
ફિલ્મ: મેરુ માલણ

કે ઓઢણી ઓઢું ઓઢું ને ઉડી જાય, ઓઢણી ઓઢું ઓઢું ને ઉડી જાય,
ના ના રે રહેવાય, ના ના રે સહેવાય, ના કોઈને કહેવાય… હાય હાય !
ઓઢણી ઓઢું ઓઢું ને ઉડી જાય.

ઓઢણી ઉડે તો ભલે ઉડી જાય, ઓઢણી ઉડે તો ભલે ઉડી જાય,
તારું મુખડું મલકાય, તારું જોબન છલકાય, મારાં હૈયામાં કૈં કૈં થાય…
ઓઢણી ઓઢું ઓઢું ને ઉડી જાય…
ઓઢણી ઓઢું ઓઢું ને ઉડી જાય.

હો રે… હો રે, મેઘ વરસે ને ભીંજે ચીર, હાય હાય હાય વાગે તીર, વાગે તીર.
ઓ રે… ઓ રે, તારું ચંદંન સરીખું શરીર, ઓયે હોયે હોયે હોયે નીતરે નીર, નીતરે નીર.
રૂપ દૂર થી જોવાય, ના ના રે અડકાય, ઈ તો અડતા કરમાય… હાય હાય !
ઓઢણી ઉડે તો ભલે ઉડી જાય…
ઓઢણી ઓઢું ઓઢું ને ઉડી જાય.

ઓ… મારે નેણ લજ્જા લહેરે છે… લહેરે છે, લહેરે છે, મારે નેણ લહેરે છે…
હો… તારા રૂપની ભીનાશ તને ઘેરે છે… ઘેરે છે ગોરી, ઘેરે છે…
હું તો સંકોરુ કાય, અંગ અંગથી ભીંસાય, મંન મરવાનું થાય… હાય હાય !
ઓઢણી ઉડે તો ભલે ઉડી જાય…
ઓઢણી ઓઢું ઓઢું ને ઉડી જાય.

હાય રે… હાય રે, ઓલી વીજળી કરે ચમકાર, હાય હાય હાય વારંવાર… વારંવાર.
ઓ રે… ઓ રે, ઈ તો હૈયાનાં સાંધે તાર, હોયે હોયે હોયે હોયે નમણી નાર… નમણી નાર.
મારું મનડું મૂંઝાય, એવી લાગી રે લ્હાય, ના ના રે બુઝાય… હાય હાય !
ઓઢણી ઉડે તો ભલે ઉડી જાય…
ઓઢણી ઓઢું ઓઢું ને ઉડી જાય.

- કવિ ?

 
(ચાંદરડું ચાહવાનું નામ…   ફોટો: વેબ પરથી)

સંગીત : રિષભ મહેતા
સ્વર : રિષભ મહેતા અને ગાયત્રી ભટ્ટ
આલ્બમ : દાંડિયાનો દરબાર

સૂરજનાં દેશમાં ચાંદો ઉગ્યો રે લોલ, જોવાને ઉમટ્યું આખું ગામ,
હર કોઈ પૂછતું, ચાંદરડું હોય શું ? (2) ચાંદરડું ચાહવાનું નામ… (2)
સૂરજનાં દેશમાં ચાંદો ઉગ્યો રે લોલ…

ચંદાના દેશમાં રાતરાણી ખીલતી, જોવાને ઉમટ્યું આખું ગામ,
હર કોઈ પૂછતું, રાતરાણી હોય શું ? (2) રાતરાણી જાગવાનું નામ… (2)
સૂરજનાં દેશમાં ચાંદો ઉગ્યો રે લોલ…

ફૂલોનાં દેશમાં ટહુકો ફૂટ્યો રે લોલ, જોવાને ઉમટ્યું આખું ગામ,
હર કોઈ પૂછતું, ટહુકો તે હોય શું ? (2) ટહુકો બહેકવાનું નામ… (2)
સૂરજનાં દેશમાં ચાંદો ઉગ્યો રે લોલ…

ટહુકાનાં દેશમાં ટીપું પડ્યું રે લોલ, જોવાને ઉમટ્યું આખું ગામ,
હર કોઈ પૂછતું, ટીપું તે હોય શું ? (2) ટીપું દઝાડવાનું નામ… (2)
સૂરજનાં દેશમાં ચાંદો ઉગ્યો રે લોલ…

ટીપાનાં દેશમાં દરિયો ડૂબ્યો રે લોલ, જોવાને ઉમટ્યું આખું ગામ,
હર કોઈ પૂછતું, દરિયો તે હોય શું ? (2) દરિયો તરસવાનું નામ… (2)
સૂરજનાં દેશમાં ચાંદો ઉગ્યો રે લોલ…

-રિષભ મહેતા

દશેરાની આપ સૌને ખૂબ ખૂબ અને શુભ શુભ શુભકામનાઓ…!   કેલેંડરોમાં અને દેશમાં નવરાત્રી પૂરી ગઈ પરંતુ અમેરિકામાં તો હજીયે આવતા વીકએંડ સુધી ગરબાની રમઝટ ચાલવાની જ છે… અને નવ દિવસ માતાજીનાં ગરબા માણ્યા, તો હવે થોડા દિવસ રાસ પણ માણી લઈએ… એ પહેલા આજે જરા હીંચ પણ લઈ લઈએ…

(મારા સાહ્યબા તારી ઠેસે મારે હીંચ લેવી છે…     ફોટો: વેબ પરથી)

સ્વર - સંગીત : ?

ઢોલીડા ઢોલ રે વગાડ મારે હીંચ લેવી છે,
હે હીંચ લેવી છે ને (મારે ગરબે ઘૂમવું છે)… ઢોલીડા…
ઢોલીડા ઢોલ રે વગાડ મારે હીંચ લેવી છે.

હે તારે કિયા ભાઈનાં ચોગલે હવે હીંચ લેવી છે ?
મારા સાહ્યબા તારે ચોગલે મારે હીંચ લેવી છે.
હે… તારા ઢોલની માથે જો ને દાંડિયું પડે ને મારા હૈડા લેરે જાય…
મારા દલડાં લેરે જાય… મારા હૈડા લેરે જાય…  ઢોલીડા…
ઢોલીડા ઢોલ રે…

હે તારે કિયા ભાઈને દાંડિયે આજે હીંચ લેવી છે ?
મારા સાહ્યબા તારે દાંડિયે મારે હીંચ લેવી છે.
હે… તારા ઢોલની માથે જો ને દાંડિયું પડે ને મારા હૈડા લેરે જાય…
મારા દલડાં લેરે જાય… મારા હૈડા લેરે જાય…  ઢોલીડા…
ઢોલીડા ઢોલ રે…

તારે કિયા ભાઈની ઠેસે હવે હીંચ લેવી છે?
મારા સાહ્યબા તારી ઠેસે મારે હીંચ લેવી છે.
હે… તારા ઢોલની માથે જો ને દાંડિયું પડે ને મારા હૈડા લેરે જાય…
મારા દલડાં લેરે જાય… મારા હૈડા લેરે જાય…  ઢોલીડા…
ઢોલીડા ઢોલ રે…

આજે નોરતાની છેલ્લી રાત… (દેશમાં તો પતી પણ ગઈ હશે!)  એટલે આજનો આ ગરબો જરા ખાસ… જે તમે બધાએ ચોક્કસ સાંભળ્યો જ હશે… લોકબોલીએ ગવાતા આ ગરબાને આજે આપણે બે રીતે માણીએ…  અથવા એમ પણ કહી શકાય કે એક જ ઢાળમાં બે ગરબા માણીએ…

(માડી તારા નમણાં નિર્મળ રૂપ…)

સંગીત : ?
સ્વર : પૂર્ણિમા ઝવેરી

માતાજીના ઊંચા મંદિર નીચા મોલ,
ઝરૂખડે દીવા બળે રે લોલ !
રાધાગોરી, ગરબે રમવા હાલો,
સાહેલી સૌ ટોળે વળી રે લોલ !
માતાજીના ઊંચા…

ક્યાં છે મારા રામસીંગભાઈના ગોરી ?
મુખલડે અમી ઝરે રે લોલ !
માતાજીના ઊંચા…

ક્યાં છે મારા વીરસીંગભાઈના ગોરી ?
હાથલડે હીરા જડ્યા રે લોલ !
માતાજીના ઊંચા…

ક્યાં છે મારે રૂપસીંગભાઈના ગોરી ?
પગલડે પદ્મ જડ્યા રે લોલ !
માતાજીના ઊંચા…

*

સંગીત : ?
સ્વર : ઉષા મંગેશકર અને પ્રફુલ દવે
ફિલ્મ : ?

- છંદ -

માડી તારા બેસણાં ગઢ ગિરનાર,
નવે ખંડ નજર્યું પડે રે લોલ.

માડી તેં તો દિપાવ્યો સોરઠ દેશ,
ધજાએ આંય ખોળ્યું ધરું રે લોલ.
માડી તારા બેસણાં…

માડી તારી લટમાં જમુના ઝૂલે,
જીભડિયે ગંગા ઝરે રે લોલ.
માડી તારા બેસણાં…

માડી તારા નમણાં નિર્મળ રૂપ,
કે કરોડ કરોડ વંદન કરું રે લોલ.
માડી તારા બેસણાં…

માડી મેં તો કો’ક દિ’ કીધા હોય,
એ પૂણ્ય તારે પગે ધરું રે લોલ.
માડી તારા બેસણાં…

માડી તારા ઊંચા મંદિર નીચા મોલ,
ઝરુખડે દીવા બળે રે લોલ.
માડી તારા બેસણાં…

*